مش هتقدر تغمض عنيك!!

السلام عليكم ورحمه الله وبركاته

الي يشوف كمية الإعلانات الرهيبة الي شغالة من اسبوعين تقريباً

عن مسلسلات وبرامج رمضان بقول دة شهر المسلسلات!

شيء مستفز بصراحة!

كل القنوات الفضائية الشهيرة-بخلاف الدينية طبعاً!- بتتنافس وتتقاتل على شراء حق عرض مسلسلات رمضان!

مافيش قناة منهم أعلنت عن برنامج ديني!

ما فيش رئيس قناة احترم نفسه وقال رمضان دة شهر الصيام والطاعات والعبادات

وقيام الليل والقرءان عشان كدة مش هنعرض إلا مواد دينية!

حاجة عجيبة والله الناس دي!

كمية إعلانات عن مجموعة مسلسلات تحسسك إنك مقبل على كارثة!

إيه دة؟!

إمال الناس هتصلي تراويح امتى وتطيع ربنا امتى وتطلع صدقات امتى ؟؟

وهتطبخ الأكل امتى وهتشتغل امتى وتتهجد امتى؟!

ولا بقى خلاص نقضيها قيام ليل أمام الفضائيات من المحور للدراما للسينما للأفلام الكوميدي لروتانا لميلودي للحياة لدريم؟!!!!!!!

نهجر المساجد في رمضان ونعمّر البيوت مبحلقين أمام التليفزيونات؟!

إيه القرف دة؟!!

مافيش رحمة؟!

مافيش رمضان؟!

بقى دة رمضان في نظركم؟!

مسلسلات وفوازير وبرامج تافهة ؟!!

بقى الفلوس تعمل فيكم كدة؟!

عموماً العيب مش فيكم إنما في المشاهدين الي عملوا لكم قيمة ونسبة مشاهدة تتهافت عليها القنوات!

يا شباب إياااااااااااكم أن تكونوا ممن يشاهد المسلسلات في هذا الشهر الفضيل بالذات

اهجروهم إلى سعادة الدارين

اهجروهم إلى الله ورسوله!

اهجروهم إلى الصدقات وتلاوة القرءان والتراويح والتهجد والدعاء وصلاة الجماعة!

إياااااااكم أن تفوتوا هذا الشهر فقد لا يعود لكم ثانية!

فكرواااا!

كم من شخص نعرفه أو لا نعرفه كان معنا رمضان الماضي ثم هو الآن بين يدي الله؟!

فكروا!

هل ضمنا بلوغ رمضان هذا العام؟!

طيب إذا يسر الله وبلغناه هل نضيع بعض اللحظات في مشاهدة مسلسل أو برنامج من إياهم؟!!!!

الكل بيستعد لرمضان بالطاعات والتمرين على قيام الليل والقرءان

والترتيب للإعتكاف في العشر الأواخر ودول بيستعدوا بالمسلسلات والبرامج!!!!!!!!!

مالناش دعوة يا جماعة!

إحنا أسمى من أن نهتم بمثل هذه الشواغل التافهة!

لا تجعل رمضان هذا العام يضيع منك بسبب مسلسل أو برنامج أو لقاء!

اجعل نهارك صيام بكل ما تعنيه كلمة صيام وقرءان وذكر وإستغفار وليلك قيام وقرءان وتراويح وتهجد ودعاء طويل!

اجعل حياتك لله مش للممثلين وللمخرجين وللفضائيات!

اجعل نومك بنية الراحة وإستعادة النشاط للقيام والطاعات حتى تثاب على هذا النوم!

لا تضيع أي صلاة مفروضة في جماعة في المسجد

أكثر من النوافل والدعاء والصدقات وصلة الرحم!

استغل وقتك خلال هذا الشهر فيما يرضي الله ولا تضيعه فيما لا يرضي الله!

مسلسلات إيه؟!

برامج مين؟!

دة إحنا في رمضان يا جماعة!!!!!!!!!

شهر الصيام شهر القرءان!

مش شهر المسلسلات والبرامج!

حتى الماتشات أعوذ بالله قبلها بساعات وبعدها بساعات يقعدوا يحللوا في كل كبيرة وصغيرة فيها

وكل ما يتعلق باللاعبين وطريقة اللعب والمدرب والحكم وحامل الراية وتفاصيل الماتش

والفرص الخطيرة وغير الخطيرة! والجمهور والملعب ورئيس النادي والإحتياطي والمحترفين وتليفونات تعلق وإعلانات!!!!!!

دة كله عشان ماتش؟!!!!!!!!!!!!!!!!!

لسة إمبارح كنت قاعده غصب عني عند أحد أقاربي مشغل قناة رياضية وقاعده متضايقه من القناة

ولكن جملة سمعتها من التافه الي بيتكلم خليتني عاوزه أخنقه!

كان بيتكلم عن حقوق إذاعة المباريات ومش عارفه إيه المهم هو اخترع كدة نسب معينة للأندية بحسب شهرتها

وحصولها عالمراكز الأول ثم قال الجملة الي كنت عاوزه أخنقه بسببها وهي

"ودة عدل ربنا"!!!!!!!!!!!

ياااااااااااااه!

بجد كنت عاوزه أخنقه!

عدل ربنا؟!!!!!!!!!

إيه اللى دخل ربنا وعدل ربنا بالقرف الي عمال تتكلم فيه؟!!!!!!!!

أنا شايفه إنه إذا كان الشياطين الجن بتتسلسل في رمضان فشياطين الإنس شغالة!

ودول والله ما أراهم إلا من شياطين الإنس!

مسلسلات ومش هتقدر تغمض عنيك ولا هتقدر تفتح بقك تقرأ قرءان أو تذكر ربنا

ولا هتقدر تقوم تصلي ولا هتقدر تعمل أي حاجة غير إنك تأنتخ أمام التلفاز!

دة طبعا لو سمعت كلامهم وتابعت مسلسلاتهم واهتممت ببرامجهم وانتظرت مبارياتهم!

انسى إنك تعمل حاجة في رمضان غير إنك تهري الريموت بتاعك وتدوخ نفسك من قناة لأخرى!

أنا دايماً بسأل نفسي الناس دي حسابها هيبقى شكله إيه؟!

الناس الي مسؤولة عن المسلسلات والبرامج دي والي بتجاهر بالمعاصي نهاراً جهاراً في رمضان وغيره!

دول هيتحاسبوا إزاي؟!

هما فكروا في كدة؟! ولا الفلوس والدنيا والشهرة عمتهم فأصبحوا صم بكم عمي فهم لا يعقلون؟!

الناس الي بتنشر الفساد وتفتن الناس وتشغلهم بالتفاهات مش هيرحمونا شوية بقى؟!

عارفين أحسن حاجة تعملوها إيه؟!

تشيلوا التليفزيون دة خالص في رمضان عالأقل!

طبعاً طبعاً طبعاً عارفه إنه ناس كتير هتقولي لأ إحنا هنشغله على قناة الناس والرحمة والحكمة

وإقرأ والعفاسي والخليجية وبقية القنوات الدينية

أنا من رأيي إنه اللي عاوز يستغل رمضان صح مش هتخيل عليه الوسوسة الشيطانية دي!

دة رأيي ومش للبيع!

ليه بقى؟

لأنه القنوات دي أكيد هتستمر في رمضان طبعاً لكن المفروض إنها للغافلين الي أصلاً مش هيروحوا يصلوا!

ولا يقيموا الليل!!!

الي عنده نية أكيدة للفوز برمضان مش هيلاقي وقت للتليفزيون من أصله!

مش وقته!!!!

دة وقت عبادات وطاعات مش دروس وخطب!

صدقوني مش وقته خالص!

إلا أصحاب الأعذار ممكن يتابعوا بعض الوقت والقنوات الدينيه بس لكن أنا بتكلم عن العام

المشكلة الحقيقية بقى في الأهل الغافلين!

بجد مشكلة عويصة جداً!

لأنك طول ما انت في وسطهم مضطر إضطراراً تسمع مالايرضيك وترى مالا يجب أن تراه والله المستعان

لكن برضه في رمضان مش من المفروض نسمح لأنفسنا بأن يضيع منا هذا الشهر العظيم ولا لحظات منه

يعني قدر المستطاع وبنية خالصة بإذن الله نفوز بهذا الشهر الكريم

اعتبروه بطولة لها إستعداد خاص وقيود ونظام معين!

للأسف الأهل لو عندهم -بعد الشر يعني!- طالب أو طالبة في الثانوية العامة

ييجوا قرب الإمتحان ولغاية ما يخلص يعملوا زي معسكر ويعلنوا حالة الطواريء ويشيلوا التليفزيون والكمبيوتر

أو يمنعوهم عن الطالب ويوفروا له كل سبل الراحة والجو المناسب للمذاكرة وللإستيعاب وللحفظ وطلباته كلها أوامر

في هذا الصدد من دروس وإسطوانات وفلوس وكتب وصحيان بدري وغيرواااا !!!!!!!!

لكن شهر رمضان بالنسبة لهم عادي جداً ولا كأن في حاجة حصلت أصلاً!

الصحابة كانوا بيستعدوا قبلها ب6 أشهر!

دول لأنهم فاهمين كويس يعني إيه رمضان وعارفين فضله وموقنين بهذا الفضل العظيم

أما إحنا يا حسرة علينا!

عمالين نستعد بالمسلسلات والبرامج والأكل!

حاجة تشل!!!!

طبعا كل كلامي السابق ضيفوا بعديه جملة مهمة

إلا من رحم ربي

اللهم اجعلنا منهم وبلغنا رمضان!

الخلاصة يا جماعة بقدر الإمكان ابعدوا عن الفضائيات وما فيها

لأن رمضان عندهم غير رمضان عندنا خااااالص!

رمضان عندهم أنزل فيه المسلسلات!

عندنا أنزل فيه القرءان!

اشغل يدك بالتسبيح والتهليل والتكبير مش بالتقليب في الريموت!

اشغل بصرك بالمصاحف مش بالمسلسلات!

اشغل أذنك بالتلاوة مش بالبرامج!

اشغل لسانك بذكر الله وتلاوة القرءان مش بالتعليق عالماتشات والمسلسلات والبرامج!

اتعب قدميك بالقيام بين يدي الرحمن بالساعات مش تخدرها بالساعات وانت "مريح" متابع للمسلسلات!

يعني يكفيك أن تتفكر فيمن مات قبل رمضان وهو الآن يحاسب في قبره وسيحاسب يوم القيامة على كل لحظة من حياته

تخيل إنه سيدنا عمر رضي الله عنه رغم أفضاله على الإسلام والمسلمين وصحابته للنبي الكريم

وعدله وقوته في نصرة الحق ووفاة النبي صلى الله عليه وسلم وهو راضي عنه ورغم بشارته بالجنة

رغم كل دة وأكثر إلا أنه كان يقول قبيل موته " ليت أم عمر لم تلد عمر ، ليتها كانت عقيما "

وذلك من شدة خوفه من الله عزَّ وجل فما بااااالك بأمثالنا؟!!!!

فلنتق الله ولتنظر نفس ما قدمت لغد!

نسألك ربي بلوغ رمضان ونسألك حسن الختام ونسألت رضاك الجنة

معلشي طولت عليكم لكن بجد الإعلانات استفتني!

اللهم بلغنا رمضان

وكل سنه وانتم طيبين وبالف خير وسعاده واعاده الله عليكم بالخير واليمن والبركات

من طرف **NEGMASAMA** السبت 22 أغسطس 2009, 1:13 am

/
*
\
*
/
*
\

اولا :- يسعدنى انى اكون اول واحده ترد على موضوع جبار زى ده
بجد يا سومه جزاكى الله كل خير وبجد تسلم ايديكى الموضوع حلو اوى
ومفيد جدا بجد ربنا يحميكى
ثانيا:-ربنا يبعدنا يارب عن القنوات الفضائيه وعن المسلسلات والبرامج التافهه دى
ويقدرنا على الصيام وقيام الليل والتهجد والاعتكاف ربنا يقوينا يارب ويقوى كل المسلمين
اجمعين
تسلم ايدك يا سومه وجزاكى الله كل خير
دمتى متألقه مبدعه ^_^

/
*
\
*
/
*
\

من طرف **{lo2lo2t alb7r}** السبت 22 أغسطس 2009, 12:04 pm

ّّّ
#
#
الله بجد جميل يا حائره ربنا يبارك فيكي وتسلم اديكي

ربنا يحمينا من المسلسلات دي

بجد دي حاجه مقرفه بدل ما يعملو حاجات دينيه وكدا

كل الدنيا بتستنا عندنا باب الحاره ولو قولتلك انا مش منهم بكون كدابه يلا ربنا يسهل

بجد اف شكر ليكي على الموضوع الجامد ده دمتي بحفظ الرحمن

رمضن كريم
#
#
ّّّ

من طرف **البحار سمسم** السبت 22 أغسطس 2009, 12:50 pm

الله يا حائره ربنا يبارك فيكي وتسلم ايدك

وتكون موعظة لكل اللى شافوا الموضوع

سما وجمانه وحسام

بجد انا سعيده انكم رديتوا على الموضوع

وفرحانه اكتر انكم وافقتونى الراى

وحابه بقى اعترفلكم بحاجه

الموضوع منقوووووول بس انا نسيت اكتب فى الاخر بس

وبجد انا الموضوع عجبنى اوى وحبيت انى اجبهولكم لانى استقفدت منه كتيييييير

من طرف **jet_liii** الأحد 23 أغسطس 2009, 2:59 am

موضوع جميل اوى اوى اوى

فعلا فى ناس مزوداها حبتين

وبيقضوا نهار رمضان كله ادام الفضائيات

بس انا رايى ان رمضان مش هيبقى كله عباده

يعنى مفيش مانع بعد الفطار الواحد يريح شويه ويتفرج ع مسلسل

او ساعه الصحور يتفرج ع التليفزيون

بس لازم نغتم الوقت ده شهر فى السنه الحسنه بعشر امثالها وربنا بيضاعفها لسبعين

يعنى لازم نطلع من رمضان واحنا فايزين

يارب اغفر لنا ما تقدم من زنبا وما تاخر

هو انت عندك حق يا جيتلى

ان اليوم مايبقاش كله عباده اكيد هايبقى فى برنامج كدا تتفرج عليه اوحاجه

بس بجد حتى لو البرنمج دا ما اتفرجناش عليه وزكرنا ربنا شويه هايبقى احسن

وزى ما انت قولت الحسنه بعشر امثاللها وفى رمضان ربنا بيضاعفها لسبعين ودى حقيقه

فا ليه ما نغتنمش الفرصه دى بجد ممكن ماترجعلناش تانى

وكمان كل المسلسلات والبرامج بتتعاد تانى بعد رمضان

فا ليه مانسمعهومش بعديييين

ع فكره انا بقول الكلام دا ليا قبل ما يكون ليكوا ههههههههه

لانى بردو بسمع برامج وقت الفطار وبالليل شويه كدا هههههههههه

وربنا يهدينا انا وانتوا ان شاء الله

والف شكر ليك يا جيلتى ونورت الموضوع وجزاك الله كل خير

مش هتقدر تغمض عنيك!!

مش هتقدر تغمض عنيك!!

رد: مش هتقدر تغمض عنيك!!

رد: مش هتقدر تغمض عنيك!!

رد: مش هتقدر تغمض عنيك!!

رد: مش هتقدر تغمض عنيك!!

رد: مش هتقدر تغمض عنيك!!

رد: مش هتقدر تغمض عنيك!!