حبيبى

من طرف ملاك الاحزان الأحد 20 يوليو 2008, 11:30 pm

حبيبي
قصدي يا اللي فهمت يوم إنك حبيبي
عامل إيه؟
رغم إن الغدر ساكن حضن قلبك
لازم اطمن عليه
قلبي صابه البعد لكن.. غصب عني
لسه داء الضعف فيه
هوه ده القلب اللى سبته ويا ناره
هو دا القلب اللي كان بعدك مراره
واللي تاه مشواره بعدك.. وانطفى في الحلم ضيه
واللى مش هتلاقى عمرك قلب زيه
قلب لما احتاج يفضفض بعد غدرك
"ما ابتداش بـ"ازاي؟" و"ليه؟
!ابتدا الأول وقال لك: عامل إيه؟

******
قلب عارفه من بدايته
فاتح الباب للي فايته
قلب بانياه الجراح
بس مسكون بالبراح
يفتحه لْكل الخلايق.. حتى لو منهم نهايته
حبي ليك
كان طبيعه ف قلبي مش إحساس جديد
حبي ليك .. شيء لقيته ببصمته جوه الوريد
وعد صممناه بإيدنا..وقلنا يبقى الصدق لونه
عمري ما اتصورت قلبك يكسر الوعد اللي بينا
واللي صنته ف يوم يخونه
كنت خايف -من بداية القصه- من آخر فصولها
هل هتبعدنا الظروف؟
هل هيفضل حبنا مسجون بخوف؟
هل بعادنا يكون نصيبنا
ولا هيفضل يسيبنا؟
....ولا... ولا
كل مشهد في النهايه.. ياما جربته ف خيالي
وياما خفتـه
!إلا غدرك... عمري في الفهرس ما شفتـه
خليتني انده على قلوب الخلايق
غصب عني.. ومالتقيش
كله بيقول: "انسى ناره
"والسعاده الحلوه عيشيها.. وماتقاسيش
مش مهم القى السعاده
!!..الاهم ازاي اعيش

******
يا حبيبي
!!قصدي يا اللي فهمت يوم إنك حبيبي
كان زمان... كنت باتمنى اني اشوفك يوم في حلمي
كنت افكر فيك دايماً قبل نومي
كنت باخلع ويا صورتك ليل همومي
كنت اشوفك كل يوم الصبح

لكن
جوه ليل الوحده من غيرك.. بالاقي الكون مفيش
كنت باسأل صورتك الحلوه تجيني.. مابتجِيش
والنهارده.. بالتقي صورتك ليلاتي
جاي مادد الإيدين بدمعك
!!عقلي يرفض.. بس يصرخ قلبي: تعالى
جاي بالعذر المكرر
تشرح.. واشتاق لك اكتر
وامسح الدمعه اللي نازله..وضحكتي في الحلم تكبر
رغم إنك بعت قلبي.. وضاع خلاص مستقبله
!!بس عذرك كنت دايماً باقبلُه
غصب عني..كنت بافرش رمشى تاني جوه حلمي
واحلم انك يوم تعدي
واصحى من نومي والاقي دمعتك
!!كانت حارقه خدي
واما باصحى.. كنت افكر
لو هتيجي بجد.. إيه هيكون جوابي؟
هل هاثور وانصر كرامتي؟
ولا يبقى الرد صمتي؟
ولا إيه؟
والحاجات الحلوه بينَا.. بس هانساهم بايه؟
شارع الشوق اللي ياما مشيته لاجل اوصل مكانك
اسمي ويا اسمك على القلب اللي في النخله البعيده
فرحتك دايماً بِخطـي.. وساعة الإيد الجديده
والنهارده
عقلي مد الإيد في قلبي وطلّع النخله وقلَعها
حتى أحلامي اللي ضاعت.. بالخساره لغيري باعها
حتى ساعة الإيد خلعها
!!وبرضه باشتاق لك زياده
!ليه عملت القلب راهب...وانت مش قد العباده؟
خليتني الصبح افكر
خليتني ف نومي افكر
واوهم القلب اللي حبك إني هانسى
وللاسف
!!!باشتاق لك اكتر
******
يا حبيبي
!!قصدي يا اللي فْهمت يوم إنك حبيبي
فاكر لما كتير سألت
ليه باقول كل الأسامي إلا إسمك؟
كنت باسكت.. عارف ليه؟
كنت حاسة إن إسمك.. فوق ما يتحمل لساني
كنت حاسة إن إسمك لو نطقته لوحدي
اكون إنسان أناني
وانت عارف.. إني مش إنسان أناني
كنت حاسة إن إسمك مش حروف
كنت حاسة إنه درعي لو هتقتلني الظروف
اسمك انت بانطقه دلوقتي عادي
واحفظه دلوقتي عادي
زي أسماء اللي قبلك
واللي بعدك
!!واللي عاشقينّي الساعة دي
صدقني

لو هتيجي ف يوم لقلبي
مستحيل لو يتفتح
!!يبقى إيه شكل القصيده.. لو خيانتك مفتتح؟
:كنت دايماً بتقول لي
لو هتطلبى منى حاجة

قولى كل ما تقولى يجاب

والنهارده
جاية باترجاك بس ف كلمتين
يا حبيبي
إنت عارف انِك خدعت
وانت عارف انّك جرحت
كفر عن ذنب قلبك
وابعد عن قلبي حبك
..لو سمحت
******

من طرف no2na_2000 الإثنين 21 يوليو 2008, 3:41 am

الله عليك بجد كلمات جميله اووووووووووووووووووووووووووووى

من طرف ملاك الاحزان الإثنين 21 يوليو 2008, 9:46 pm

الجميل انك نورتى الصفحة no2na وشكرا لمرورك الذى اضاء الصفحة

ولكٍ منى خالص الشكر

من طرف **MR.mando** الإثنين 21 يوليو 2008, 10:47 pm

بتلف الدنيا بينا وساعات بتجرحنا وساعات بنتألم وساعات بنستسلم بس مع كل جرح بنتعلم
لقد نزف قلبك بحرقه وابدع قلمك بالتعبير عن احساسك
فاتمني ان تنتهي الجراج وترسم الابتسامة علي شفاهكي من جديد
وشكرا لموضوعك الاكثر من رائع ومنتظرين جديدك دائما